MAGSAYSAY, Occidental Mindoro — Muling pinatunayan ng Lokal na Pamahalaan ng Magsaysay ang matibay nitong paninindigan sa serbisyong panlipunan sa isinagawang Ang Serbisyo’y Ihatid Natin (ASIN) Grand Caravan 2026, tampok sa pagdiriwang ng ika-57 anibersaryo ng bayan noong Abril 7 sa Municipal Evacuation Center.

Sa pangunguna ni Municipal Mayor Cesar M. Tria Jr., naging sentro ng programa ang mga benepisyaryo ng Pantawid Pamilyang Pilipino Program (4Ps), kung saan 88 na pamilya mula sa Barangay Poblacion ang agarang nabigyan ng iba’t ibang serbisyong panlipunan, pangkalusugan, at pangkabuhayan.

Ipinakita ng caravan ang matatag na ugnayan ng 4Ps at ng Lokal na Pamahalaan, kung saan patuloy na inuuna ang kapakanan ng mga pamilyang higit na nangangailangan. Sa pakikipagtulungan ng Municipal Social Welfare and Development Office (MSWDO) at ng 4Ps sa pamamagitan ng Municipal Link na si Angelique Valiente-Villarez, naging maayos at epektibo ang paghahatid ng serbisyo sa mga benepisyaryo.

“Hindi lamang ito simpleng caravan. Isa itong konkretong patunay na ang LGU at 4Ps ay magkasangga sa pag-angat ng buhay ng bawat pamilya,” ayon sa isa sa mga tagapagpatupad ng programa.

Sa ilalim ng pamumuno ni Mayor Tria, kapansin-pansin ang tuloy-tuloy na pagbibigay prayoridad sa 4Ps beneficiaries, na kinikilala bilang mahalagang sektor sa pagpapaunlad ng komunidad. Ang kanilang aktibong partisipasyon sa programa ay patunay ng isang inklusibong pamahalaan na walang iniiwan.

Ilan sa mga pangunahing serbisyong inihatid ay ang libreng medical at laboratory services, pamamahagi ng gamot, eye check-up at libreng salamin, tuli, at animal bite vaccination—mga serbisyong direktang tumutugon sa pangangailangang pangkalusugan ng komunidad.

Nagbigay rin ng orientation ang Philippine Red Cross ukol sa insurance, habang isinagawa ang Yakap Registration upang higit pang mapalawak ang saklaw ng social protection. Samantala, naghatid ng karagdagang benepisyo ang libreng gupit at pamamahagi ng SIM cards mula sa DICT, na naglalayong palakasin ang akses ng mga pamilya sa komunikasyon at impormasyon.

Hindi rin nawala ang mahalagang diskusyon mula sa MSWDO hinggil sa mga programa para sa Senior Citizens, Persons with Disability (PWD), at Solo Parents, na nagbigay-linaw sa mga benepisyong maaari nilang matanggap at kung paano makakalahok sa mga ito.

Higit sa lahat, ang ASIN Grand Caravan ay nagsilbing malinaw na larawan ng isang pamahalaang may malasakit—kung saan ang serbisyo ay hindi hinihintay, kundi aktibong inilalapit sa mamamayan.

Sa bawat ngiti ng mga benepisyaryo, kapansin-pansin ang epekto ng isang programang may puso at direksyon. Sa tulong ng matibay na partnership ng LGU at 4Ps, patuloy na binubuo ang isang komunidad na may pag-asa, pagkakaisa, at pantay na oportunidad para sa lahat.

##