Para sa isang ina, walang hihigit pa sa pangarap na mabigyan ng mas magandang kinabukasan ang kanyang mga anak. Ito ang pangarap na araw-araw na pinanghawakan ni Emely M. Mangaya, 54 taong gulang, mula sa Sitio Centro, Barangay Doña Juana, San Agustin, Romblon, isang dating benepisyaryo ng Pantawid Pamilyang Pilipino Program (4Ps) at masugid na Parent Leader ng kanilang komunidad.

Hindi naging madali ang kanilang paglalakbay. Bilang ina ng apat na anak, madalas na kapos ang kanilang kabuhayan upang tugunan ang pang-araw-araw na pangangailangan. May mga pagkakataong kailangan nilang mangutang para lamang may maihain sa hapag-kainan at maipagpatuloy ang pag-aaral ng mga bata.

“Bilang magulang, masakit makita ang mga anak na may pangarap ngunit kulang ang kakayahan naming tustusan ang kanilang mga pangangailangan. Pero hindi namin hinayaang mawalan kami ng pag-asa,” pagbabalik-tanaw ni Nanay Emely.

Nagkaroon ng bagong pag-asa ang kanilang pamilya nang sila ay mapasama sa 4Ps noong 2010. Ang programang minsang nagsilbing sandigan sa panahon ng kanilang pangangailangan ay naging mahalagang katuwang upang mabawasan ang kanilang pangungutang at mapanatiling nakatutok ang pamilya sa edukasyon at kalusugan ng kanilang mga anak.

Higit pa sa tulong-pinansyal, naging daan din ang programa upang mas mapalawak ang kaalaman at kakayahan ni Nanay Emely. Bilang Parent Leader, nagsilbi siyang tulay ng impormasyon sa mga kapwa benepisyaryo at katuwang ng DSWD sa pagsusulong ng responsableng pagiging magulang at pagsunod sa mga kondisyon ng programa.

“Malaki ang naitulong ng 4Ps sa aming pamilya. Hindi lamang pera ang ibinigay nito kundi pag-asa, gabay, at pagkakataong mas mapabuti ang aming buhay. Natuto kaming mangarap nang mas mataas para sa aming mga anak,” aniya.

Sa pamamagitan ng mga Family Development Sessions, seminar, workshop, at iba pang capacity-building activities, unti-unting nahubog ang kanilang kakayahang harapin ang mga hamon ng buhay. Ang mga aral na kanilang natutunan ay naging pundasyon upang mas maging responsable sa pagdedesisyon at mas matatag sa pagharap sa kahirapan.

Ngunit higit sa lahat, ang pinakamahalagang bunga ng kanilang pagsisikap at pakikipagtulungan sa programa ay makikita sa tagumpay ng kanilang mga anak.

Isa sa pinakamalaking biyaya na kanilang natanggap ay nang mabigyan ng pagkakataon ang kanilang panganay na anak na maging iskolar sa ilalim ng Expanded Government Internship Program for Pantawid Pamilya Association (EGPPA) Scholarship Program. Dahil dito, nabawasan nang malaki ang gastusin sa kanyang pag-aaral hanggang sa makapagtapos siya ng Bachelor of Secondary Education major in English sa Romblon State University–Odiongan Campus bilang Magna Cum Laude.

Mula sa pagiging batang nangangarap lamang noon, isa na siyang matagumpay na propesyonal na nagsisilbing Senior Program Development Officer sa AIM Makati. Ang isa naman nilang anak ay isa nang miyembro ng kapulisan bilang si Police Officer Aaron Spyke Mangaya, habang ang kanilang bunsong si Red Vincent Mangaya ay kasalukuyang nagtatapos ng kursong Bachelor of Science in Criminology.

Sa bawat medalya, diploma, at tagumpay na natatanggap ng kanyang mga anak, nakikita ni Nanay Emely ang bunga ng kanilang mga sakripisyo bilang magulang.

“Kapag nakikita kong unti-unti nilang naaabot ang kanilang mga pangarap, pakiramdam ko ay sulit ang lahat ng pagod at paghihirap namin noon. Wala nang mas hihigit pang gantimpala para sa isang ina kaysa makita ang kanyang mga anak na matagumpay at may magandang kinabukasan,” buong pagmamalaki niyang pahayag.

Ngayon, ang pamilyang minsang nag-alala kung saan kukuha ng pambili ng pagkain at pambayad sa paaralan ay isa nang buhay na patunay na ang kahirapan ay hindi hadlang upang maabot ang tagumpay.

Ang kanilang kwento ay sumasalamin sa layunin ng Pantawid Pamilyang Pilipino Program, ang putulin ang siklo ng kahirapan sa pamamagitan ng edukasyon, kalusugan, at responsableng pagpapalaki sa mga anak. Sa tulong ng programa, sa pagkakaisa ng pamilya, at sa walang sawang pagsisikap ng isang ina, ang mga pangarap na dati’y tila napakalayo ay naging realidad.

Para kay Nanay Emely, simple ngunit makapangyarihan ang kanyang mensahe sa mga pamilyang patuloy na nagsusumikap:

“Huwag kayong susuko. Kahit gaano kahirap ang buhay, ipagpatuloy ninyo ang pagsuporta sa pag-aaral ng inyong mga anak. Magtiwala sa Diyos, magsikap, at maging matiyaga. Darating din ang araw na aanihin ninyo ang bunga ng inyong mga sakripisyo. Kung kinaya namin, kaya rin ninyo.”

Sa likod ng bawat matagumpay na anak ay isang inang hindi tumigil mangarap. At sa kuwento ni Nanay Emely Mangaya, ang pangarap ng isang ina ay naging tagumpay ng buong pamilya.