Ang mga naipong plastik ng mga benepisyaryo ay ginugupit at isinisilid sa 1 litrong bote ng plastik

Boac, Marinduque – Upang makatulong sa pagbabawas ng basura sa kapaligiran, ang mga benepisyaryo ng Pantawid Pamilyang Pilipino Program sa iba’t ibang baranggay ng Boac, Marinduque ay nangolekta ng mga balat ng tsitsirya at iba pang plastik na hindi naibebenta upang gawing mga ecobricks.

Sa isinagawang Family Development Session (FDS) ng Pantawid Pamilya ngayong buwan ng Enero, itinuro sa mga benepisyaryo ang paggawa ng ecobricks bilang kanilang aktibidad sa kanilang paksa sa Waste management and ecobrick-making. Upang makabuo ng isang ecobrick, nag-ipon ang mga benepisyaryo ng mga balat ng tsitsirya at iba pang plastik na kanilang isinisisiksik sa isang litro ngg bote na walang laman. Naglalayon ang aktibidad na ito na mabawasan ang dami ng plastik sa kapaligiran at sa kanilang mga tahanan. Ang mga plastik na naiipon ay kanilang ginugupit at isinisilid sa isang plastik na bote upang maging matigas. Magagamit ang mga ito sa paggawa ng mga bagay na kapakipakinabang katulad ng mga upuan at mesa.

Tuwing araw ng pagpupulong para sa FDS, bitbit ng mga benepisyaryo ang kanilang mga naipong ecobricks upang mamonitor ng mga Municipal Link o City Link ng Pantawid Pamilya. Ayon sa mga benepisyaryo, ang paggawa ng ecobricks ay sinasabing nagdulot kaagad ng malaking pagbabago sa kanilang pamamahay at komunidad. Dahil sa kanilang proyektong ito, wala nang mapapansing kalat sa kanilang kapaligiran dahil halos lahat ay nangongolekta ng basura. Maging mga bata ay nag-iipon at kumukuha na rin upang ibigay sa kanilang mga magulang. Ang iba naman ay ginagawang libangan ang paggupit ng mga plastik na inilalagay sa mga plastik na bote. Bukod sa nakakatulong ito sa kapaligiran, nagbibigay rin ito ng kalibangan sa mga benepisyaryo.

Ipagpapatuloy sa susunod na buwan ang kanilang natapos na mga ecobricks at pagpaplanuhan kung ano ang kanilang maaring buuin gamit ang mga ito.

Contributor: Ezra Mae Par Pelaez

Noong ika-30 ng Setyembre 2018, ang Bangbangalon Consumers Cooperative (dating Bangbangalon SLP Association) ng Boac, Marinduque ay nagsagawa ng sama-samang pagsasaayos at pagpapaganda ng kanilang munting opisina. Munti mang maituturing, ito ay nagsisilbing tahahan kung saan magsisimula ang mga pangarap ng pagsulong at pagtawid mula sa kahirapan.

Ang bawat miyembro ay naglaan ng kani-kanilang oras upang maisaayos ang kanilang opisina. Ayon kay Ginang Anelor M. Lamoc, chairperson ng kooperatiba, “dito ilalagak ang lahat ng kagamitan ng kooperetiba na ginamit sa negosyong catering. Dito rin ginagawa ang paghahanda at pagluluto ng pagkain. At ngayong maayos na, maaari na din kaming makapagpulong dito buwan-buwan.”

“Para mapalago ang ibinigay na tulong sa amin ng gobyerno, kailangan naming maghanap pa ng ilan pang mga pagkakakitaan tulad ng mga tindahan o mga processing [center] para mayroong alternatibong magagawa pang iba hindi lang catering at feeds retailing,” dagdag pa niya.

Ikinuwento naman ni Ginang Mercedita Oracion, cook ng kooperatiba, “nakatulong sa aking pamilya ang samahan dahil sa ako ang tumatayong cook sa aming catering.  Ako rin ay isa sa mga nakaka-attend ng mga libreng seminar ng DSWD at sa ngayon willing pa din akong dumalo ng mga seminar para madagdagan ang aking kaalaman.“

“Gusto kong magpasalamat sa DSWD, sa tulong na ibinigay nila sa amin ngayon na malaki talagang kaalwanan sa amin. Kung baga po sa mga naghihirap na hindi makatugon sa pag-aaral ng mga anak. Gusto po namin magpasalamat sa inyo nang lubos lalung-lalo na po sa aming dating PDO na si Sir Adonis (Provincial Coordinator sa ngayon) kahit po kami ay pasaway, kami po ay tinutukan niya,” madamdaming pasasalamat ni Ginang Anelor. Bukod sa teknikal na kaalaman, kooperasyon at pagkakaisa ang ilan sa mga mahahalagang katangian na dapat matutunan ng bawat myembro ng isang samahan upang sila ay umangat sa kahirapan. ###

Contributor:

John Paul B. Abaincia, Project Development Officer II, Marinduque

“Hindi porke mahirap, titigil ka na. Kung may pangarap ka, lahat ay gagawin mo matupad lang ito.”

Ito ang katagang nasambit ni Ivy Joy Aguiflor, isang Expanded Students’ Grant-in-Aid Program for Poverty Alleviation (ESGP-PA) scholar ng Pantawid Pamilyang Pilipino Program sa pakikipagtulungang ng Comission on Higher Education (CHED), na nagtapos na Cum Laude sa kursong Bachelor of Science in Secondary Education Major in Mathematics sa Marinduque State College mula sa Guisian, Mogpog, Marinduque.

Ayon kay Ivy, malaking tulong ang pagiging ESGP-PA scholar niya upang makapagtapos siya ng pag-aaral.

Si Ivy ay nagmula sa isang mahirap na pamilya na naninirahan sa Brgy. Guisian, Mogpog Marinduque. Ang kanyang ama ay si Crispin Aguiflor na isang mangingisda at ang kanyang ina naman ay si Marilyn Aguiflor na isang mabuting maybahay. Siya ay panganay sa tatlong magkakapatid. Ang kanyang mga kapatid ay mga kapwa masisikap din sa pag-aaral si Mark Denver, 17 taong gulang na nag-aaral sa Marinduque State College na nasa ika 12 na baitang, samantalang si Ellen Grace ay nasa ika 11 na baitang sa paaralan ng Quezon-Roxas High School of Marinduque Foundation Inc. Mula sa maliit na kita sa pangingisda ng kanyang ama ay pinagkakasya nila ang pang araw araw na gastusin.

Hangad ng kanilang mga magulang na makapagtapos sila lahat ng pag-aaral upang maging maganda ang kanilang kinabukasan. Ngunit di alintana na umabot sa puntong, silang magkakapatid ay sabay-sabay na nagsipag-aral, at dahil dito sila ay kinakapos. Laking pasasalamat nila na kabilang sila sa  Pantawid Pamilyang Pilipino Program na nakakatanggap ng tulong mula sa gobyerno, kung saan ang dalawa niyang nakababatang kapatid ay benepisyaryo ng programa samantalang siya naman ay isang Scholar ng ESGPPA.

Bagaman, sadyang napakahirap ng buhay at madalas ay salat sa lahat ng bagay ang kanilang pamilya dumating sa sitwasyon na pinahihinto na siya ng kanyang ama dahil hindi na kakayanin ang tumataas na gastusin. Ngunit di sya nagpatinag, gumawa siya ng paraan para maipagpatuloy pa niya ang kanyang pag-aaral. Dobleng pagtitipid ang kanyang ginawa para mabawasan ang kanyang gastusin na kung saan ang mga kagamitan niya sa pag-aaral katulad ng pag-photocopy ng kanilang mga aralin ay kanya na lamang niyang sinusulat. May pagkakataon sya na lumapit sa munisipyo para himingi ng tulong pinansyal para sa karagdagang allowance.

Laking tuwa ni Ivy nang nagbunga ang kaniyang paghihirap nang siya ay naging Cum Laude noong siya ay grumadweyt noong Marso 2018. Hindi biro ang mga karanasan na kanyang pinagdaanan upang marating niya ang dulo ng tagumpay kung kaya malaki ang kanyang pasasalamat sa programa ng gobyerno na isa sa naging dahilan upang marating niya ito. Ika nga niya, “ang kahirapan ay hindi hadlang sa pag-abot ng mga pangarap.” ###

Submitted by: Myka Ciela R. Granaderos

“Tatay sa umaga, nanay sa gabi” ang benepisyaryo ng Pantawid Pamilyang Pilipino Program na si Emmanuel Malalad na tubong Brgy. Tugos, Boac, Marinduque. Hiwalay man sa kanyang asawa ay kinakaya pa rin niyang mag-isa ang pagtataguyod sa kanyang limang anak na sina Kristine, 12 taong gulang, Jhon Moises, 10 taong gulang, John Alfred 8 taong gulang, Emmanuel Jr. 7 taong gulang at Antonnete 5 taong gulang at kasalukuyang nag-aaral sa mababang paaralan ng Don Luis Hidalgo Memorial sa bayan ng Boac.

Naging miyembro ang kanilang pamilya ng Pantawid Pamilya Pilipino Program noong taong 2013 at ang kanyang kabiyak na si Maida Malalad ang unang naging grantee ng programa. Noong taong 2013, umalis si Maida patungo sa Maynila upang magtrabaho subalit di na ito bumalik sa kanilang pamilya magpahanggang ngayon. Simula noon, si tatay Emmanuel na ang tumayong tatay at nanay sa lima nilang anak. Siya na rin ang pumalit na grantee sa programa. Taong 2014, napagdesisyunan nilang lumipat at manirahan sa Brgy. Santol, Boac, Marinduque. Si Tatay Emmanuel ang regular na dumadalo ng buwanang Family Development Sessions (FDS) at iba pang mga gawain sa programang Pantawid Pamilya.

Nagsisimula ang araw ni Tatay Emmanuel sa ganap na ika 3:45 ng umaga kung saan siya ay gumigising upang umpisahan ang kanyang trabaho bilang isang tindero ng pandesal. Ang kinikita niya dito na Php140 pesos sa umaga ay pinangbibili na niya ng bigas at ulam para sa kanilang mag-aama. Pagkatapos ng kaniyang pagtitinda bandang 6:30-7:00 ng umaga, hinahatid na niya ang kaniyang mga anak sa eskwelahan. Bandang alas 9:00 ng umaga, nagsisimula na siyang mag-asikaso ng pagluluto ng pagkain para sa pananghalian ng kanyang mga anak na siyang dadalhin niya sa eskwelahan para naman makakain ng tanghalian ang mga bata. Pagkatapos ng klase ng kanyang mga anak, sinisikap ni Tatay Emmanuel na turuan ang kanyang mga anak sa kanilang mga aralin sa eskwelahan. Sinisikap niyang ipamulat sa kanyang mga anak ang kahalagahan ng edukasyon na nakatutugon din sa kondisyon ng programa.

Mahirap man na mag-isang nagtataguyod sa kaniyang mga anak, sinisikap ni Tatay Emmanuel na magampanan lahat ng kanyang mga tungkulin bilang isang magulang. Salat man sa edukasyon, sari-saring trabaho ang pinapasok ni Tatay Emmanuel upang matugunan ang pangangailangan ng kanyang pamilya. Ayon sa kanya, gusto niyang makatapos ng pag-aaral ang kaniyang mga anak upang guminhawa ang kanilang buhay. Bilang isang magulang nagagamit din niya ang kanyang natututunan sa FDS tungkol sa tamang pagaaruga sa mga bata kaya naman ibinabahagi niya ang mga kagandahan asal at ultimong gawaing bahay ay unti-unti na rin natututunan ng kanyang mga anak. Bagaman sila ay hiwalay sa kasalukuyan ng kaniyang kabiyak, palagi pa rin niyang ipinapaalala sa kanyang mga anak na huwag silang magalit sa kanilang ina sapagkat nanay pa rin nila ito. Bilang pandagdag suporta sa kanilang kinikita siya din ay umeekstra bilang tagalitson ng manok, nagluluto ng fishball, nag-aalaga din siya ng baboy at manok at nagtatanim ng gulay sa paligid ng kanilang bahay pandagdag sa kanilang kakainin sa araw araw.

Bilang isang miyembro ng Pantawid Pamilya, si tatay Emmanuel ay aktibo sa lahat ng mga gawain ng programa ayon sa kaniyang parent leader. Hanga sila sa pagiging masipag at maabilidad ni Tatay Emmanuel. Nakikita nila ang pagmamahal niya sa kaniyang mga anak. At upang maipamulat sa kaniyang mga anak ang pagiging may takot sa Diyos, sama sama naman silang sumasamba sa kanilang simbahan tuwing Miyerkules at Linggo. At kung minsan naman, sila ay naliligo sa dagat bilang kanilang “bonding”. Aktibo rin si Tatay Emmanuel sa mga gawain sa eskwelahan ng kaniyang mga anak.

Bagaman hindi biro ang pagiging isang “single father”, malaki pa rin ang pasasalamat niya sa Diyos at sa tulong na rin ng cash grants na natatanggap kada dalawang buwan ay nakakaya niyang itaguyod ang kanilang mga anak. Nagpapasalamat siya dahil kahit hirap sila sa buhay, walang sakit ang kanyang mga anak, at lalong hindi nagkakaroon ng anumang problema sa kanilang pag-aaral. At higit sa lahat, ay binibigyan pa rin siya ng malusog at malakas na pangangatawan para harapin ang lahat ng hamon ng buhay at dahil dito alam niya, at naniniwala siya na kayang kaya nilang harapin ng kaniyang mga anak ang anumang pagsubok na darating pa sa hinaharap. ###

Submitted by: Ezra Mae P Reforma

Si Elegio Regencia isang simpleng haligi ng tahanan mula sa Bgy. Punong, Sta Cruz Marinduque. Siya ay may apat na anak na mag-isang nagtaguyod para sa kaniyang pamilya simula ng sila’y iwanan ng kanyang asawa noong 2016.

Maihahalintulad na malaking pagsubok para sa isang amang katulad ni Elegio ang hamon para magsimulang muli mula sa pag abandona ng kanyang asawa sa kanilang mag-anak. Nang iniwan siya nito, halos ang apat niyang anak ay madalas kasama sa feeding program ng eskwelahang pinapasukan dahil sa ang mga bata ay kulang sa sapat na timbang. Bilang isang tatay masakit na malaman niya na bagamat kumpleto ang sustentong ipinapadala sa maybahay, napakahirap tanggapin na lahat ng kanyang pinaghirapan ay nauwi lamang sa wala. Bagamat masakit ang kalooban sa pangyayari, minabuti niyang bumangon at magpakatatag para sa kanyang mga anak.

Mula sa simpleng pamumuhay niya at apat niyang mga anak, kahit mahirap ang naging sitwasyon pinilit nilang maging buo. Sumasabak siya sa pagtrabaho sa konstraksyon, at sa bukid at dagat naman tuwing sabado at linggo upang matugunan ang pangangailangan ng pamilya.

Bagamat malalim ang sugat na dinulot ng paghihiwalay ng mag-asawa, hindi ito nagging dahilan upang tumalikod sila sa pagmamahal at pagtitiwala sa Panginoon. Kaya naman kabila ng lahat ng kaniyang pinagkakaabalahan, hindi nila nakaklimutang dumalo ng misa sa barnagay tuwing Linggo kasama ang kaniyang mga anak.

Kahit siya ang nag-iisa na tumatayong magulang sa pamilya, kanya pa ding naisasakatuparang matugunan ang pagdalo sa mga aktibidad at programa ng mga anak sa eskwelahan. Makikita ang kanyang katatagan sa pagiging isang lider lalo na ng maihalal siyang PTA President sa eskwelahan ng mga bata. Marahil nakita ng kanyang mga kapwa magulang ang kanyang determinasyon para bumangon muli bagkus ang nangyaring pagsubok sa buhay. Napag-alaman din na mula sa kanyang galing, sipag at tiyaga, halos lahat ng kanyang apat na anak ay naging maayos ang pangangatawan at nagkaron ng mataas na karangalan mula sa kanilang eskwelahang pinapasukan.

Masasabing isang magandang ehemplo ang tatay na si Elegio di lamang sa kanyang mga kapwa benepisyaryo kundi maging sa kanyang komunidad. Nabigyan din siya ng pagkakataon upang makapagsilbi sa komunidad bilang isang lupon sa Barangay.

Sa lahat ng kanyang nagging katungkulan bilang isang lider sa paaralan at komunidad kanyang nabanggit na naging malaki ang katulungan ng Pantawid Pamilyang Pilipino Program sa kanyang kalagayan sa kasalukuyan. Malaking bagay ang mga natututunan nya sa Family Development Session (FDS) ng Pantawid Pamilya lalo na sa aspetong pagiging responsableng magulang at mamamayan. Dito niya rin nalaman ang lahat ng bagay tungkol sa kalusugan at kahalagahan ng edukasyon. Malaking pasasalamat din ang kanyang nais ibigay sapagkat nagkaron siya ng pagkakataong makapagsimula ng maliit na hayupan mula sa puhunang naibigay ng Sustainable Livelihood Program (SLP). Masasabing siya din ay isang magandang ehemplo sa kanyang mga kapwa benepisyaryo sapagkat walang pagkakataon na di niya nagawang dumalo sa FDS kahit sa mga sandaling siya ay kailangang magtrabaho bagkus mas pinipili niyang magpaalam sa Amo kapalit ng kanyang pagdalo sa FDS activity.

Si tatay Elegio na isang maituturing na huwarang indibidwal at modelong benepisyaryo ay isang responsableng magulang at magandang halimbawa lalo na sa kanyang mga anak at komunidad.

Kanyang tinuran, “sa bawat pagdapa at pagsubok na aking naranasan, sa aking mga anak ako humuguhot ng lakas upang bumangon muli sapagkat sila ang aking tanging yaman at karangalang tunay”. ###

Submitted by: Maria Shienna R. Palma

A mother has a heart of a soldier. It beats to protect her children. In its veins flow endless compassion and care. Its walls are strengthened by hope and grace. It sees the ugly and transforms it into a multitude of admirable beauty. Its muscles are collections of wisdom that reflects in the heart of her children.

Lilian Garcia, 46, a mother of four has survived countless defeat and has won numerous battles. She married at an early age and since then, she has been fighting to keep her family’s head above water. Her husband, a farmer, barely compensates to the lack of financial capacity to send all their children to school. But her sheer desire to fulfill her dream of seeing all the children finish their education fuels her motivation to fight harder.

A couple’s story

Farming was the major source of income the Garcia couple has in the early stage of their marriage. The meager amount they earn a day cannot cover daily expenses for a family of six. Aurello, her husband, had to wake up at four in the morning to fish so Lilian could vend the catch in hope of stretching their financial stick. Even with two sources of income, the couple barely met the needs of their family.

“Minsan talaga, noon, kapag walang wala na kami makuhanan ng pera, humihingi na din ako ng tulong sa mga magulang ko kapag meron silang extra,” recalled Lilian. Her determination was not weakened by her financial circumstance. Lilian is naturally resourceful. She shared, “ako talaga ang iniisip ko ay mapagkakakitaan parati. Ginawa ko talaga yung kinikita naming sa pagtatanim at pangingisda at yung tulong mula sa magulang ko, inipon ko para makapagtayo ng maliit na sari-sari store.”

The absence of electricity in their area in Abra de Ilog, Occidental Mindoro made it difficult for Lilian to manage the store at night. She remembered having to light up a small candle, hoping it would last until ten in the evening so she can save the money to buy another one.

Her family suffered a massive blow when one of her husband’s leg got paralyzed due to a dysfunction in the veins. Aurello had to stop farming for at least 3 months, which meant losing half of their earnings at that time. “Doon ako talaga sobrang nahirapan, kasi gastos sa gamot sa pang araw-araw pa, kaya talagang hirap na hirap ako,” shared Lilian.

A shed of light

The Sustainable Livelihood Program of the Department of Social Welfare and Development aims to alleviate poverty by providing financial assistance for livelihood purposes. Lilian is fortunate to be granted a total amount of Php 10,000.00 as a start-up capital for a business. She used the capital to add items to sell in her sari-sari store. Sitio Balagnan is situated far off the town of Abra de Ilog where most markets are.

Residents in their community have to ride a boat for an hour and a half to get to town to stock up groceries consumable in a week or a month.  This gave Lilian an idea to begin retailing rice and other goods in their sitio to help people save time from visiting town for groceries. The sari-sari store and rice retail began to flourish and her monthly income increased. Now, her family has enough money to spend for their daily expenses.

Money became a bit tighter when two of her children stepped in college. A huge chunk of the budget had to be allocated for their studies. Instead of having one of them to stop schooling, she welcomed the opportunity of venturing into another business, the selling of ready-to-wear clothes. Lilian then had extra money saved which she used to buy clothes to sell.

With a clear goal to increase her profit, she was able to earn the capital back and kept all her business afloat. As today, three of her children have already graduated and two of them are now employed. Her store earns steadily and she continuously saves for future use. She assures to deposit a fixed amount of money on a monthly basis.

Sharing the success

Lilian’s dream of seeing all her children complete their college degrees is nearing its realization. She has her youngest at junior highschool and part of her savings will be allocated to his college studies. Lilian proudly said, “Umalwan na ang buhay naming at patuloy pa din sa pagsasaka ang mister ko para malaki pa din ang kita namin sa buwanan.” 

SLP has provided a platform for success to the Garcia family and Lilian is now ready and determined to inspire the community with her story. She is a leader of 25 other grantees and serves as a guide as to how they can spend the cash grants wisely. Lilian has fought adversities and stood resilient against challenges brought by financial incapacities. Like a real soldier, she fought and now marches on the road to the glorious finish to her greatest battle yet – influencing the whole community into becoming a success in their own business venture. ###

Contributor:

Dwight Macabuhay

Ang mga C/MLs ng MIMARO habang nagsasagawa ng workshop para sa kanilang pagsasanay

Metro Manila – Matagumpay na isinagawa ang Learning and Development Intervention (LDI) on Strengthening Partnership and Advocacy upang pagtibayin ang kakayahan ng mga kawani ng Pantawid Pamilyang Pilipino Program ng Department of Social Welfare and Development Field Office MIMAROPA sa Makati Palace Hotel, Makati City noong Nobyembre 26-29, 2018. Ito ay dinaluhan ng 53 City at Municipal Links (C/MLs) mula sa iba’t ibang munisipyo ng Oriental Mindoro, Occidental Mindoro, Romblon, at Marinduque.

Layunin ng nasabing pagsasanay ang mahubog pa ang kakayahan ng bawat kawani sa pagbuo ng ugnayan sa iba’t ibang ahensya at departamento na katuwang nila sa pagpapatupad ng programang Pantawid Pamilya sa kanilang mga bayan at mga probinsya. Kasabay nito, bibigyang-kaalaman din ng pagsasanay ang mga C/MLs upang mapagtibay ang adbokasiya ng programa katuwang ang mga benepisyaryo.

Nagsimula ang pagsasanay sa pagpapatibay ng kaalaman ng mga kawani patungkol sa iba’t-ibang uri ng pamamaraan ng mabisang pakikipagugnayan sa iba’t ibang mga ahensya na nakakasalamuha nila sa kanilang mga munisipyo. Nagbahagi din ang bawat probinsya ng kanilang mga kinakaharap na suliranin pagdating sa pakikipag-uganyan o partnership at mga hakbangin na ginagawa nila upang mabigyan lunas ang mga suliraning ito. Ang mga nasabing gawain ay tinutukan at binigyang-diin ng mga Institutional Partnership Division Officers (IPDO) na sina Bb. Kacelyn Francisco, Civil Society Organization (CSO) focal, Bb. Margie Ann Fruelda, Supply Side Assessment (SSA) focal, at G. Ernesto David Jr, National Government Agency (NGA) focal .

Matapos nito ay binigyan din ng pagkakataon ang bawat isa na isagawa ang iba’t ibang aktibidades na makakatulong sa paghubog ng kanilang kakayahan sa Social Marketing sa tulong ni Bb. Maria Alyssa L. Esguerra, Regional Information Officer, at Bb. Diane Magbanua, Segment Producer of GMA News, tulad ng pagawa ng photo story documentation, news and feature writing, at kung paano humarap sa media.

Lubos na pasasalamat at ipinahatid ng bawat kalahok sa mga pagsasanay na ginawa nila sa loob ng apat na araw na gawain.

Inaasahan ng bawat isa na mas magiging mabuti ang pamamaraan ng komunikasyon at koneksyon nila sa mga katuwang na indibidwal, ahensya at mga departamento sa mga gawain patungkol sa pagpapatupad ng Pantawid Pamilyang Pilipino Program at ganun na din ang pag-asa nilang mas mapapabuti ang paglalahad nila ng mga gawain at kaganapan sa loob ng programa sa pagamit ng social media at iba pa.

Sa Disyembre 11-14, 2018, isasagawa naman ang LDI para sa ikalawang pangkat ng mga C/MLs ng Palawan sa Palawan Uno Hotel, Puerto Princesa, Palawan.###

Submitted by: Reylyn R. Villena

Puerto Princesa, Palawan – Ipinagkaloob ng mga miyembro ng Bangko Sentral ng Pilipinas Employees Association, Incorporated (BSPEAI) ang isang araw na medical mission sa mga katutubong Batak na benepisyaryo ng Pantawid Pamilyang Pilipino Program noong December 1, 2018. Idinaos ang nasabing aktibidad sa Sitio Makandring, Barangay Langogan, Puerto Princesa City upang maihatid ang serbisyong pangkalusugan sa mga mamamayang lubos na nangangailangan at mahirap maabot ng mga serbisyong katulad nito.

Sa pakikipag-ugnayan sa konseho ng Barangay Langogan at sa lokal na pamahalaan ng Puerto Princesa City ay matagumpay na naidaos ang aktibidad na pinangunahan ng BSPEAI katuwang ang mga kawani ng Department of Social Welfare and Development-Pantawid Pamilyang Pilipino Program at Armed Forces of the Philippines.

Ang Medical Mission ay dinaluhan ng 212 na indibidwal na pawing mga katutubo ng nasabing barangay. Maliban sa konsultasyon, ilan pa sa mga serbisyong ipinagkaloob ay ang libreng bunot ng ngipin, pamimigay ng libreng gamot at bitamina, libreng pakain, pagpapagupit, pamimigay ng mga laruan sa mga bata, at pamimigay ng hygiene kit sa bawat sambahayan. Kalakip ng aktibidad ay ang pagbibigay ng aliw sa mga bata at sa kanilang mga magulang sa pamamagitan ng mga palaro na may nakalaang papremyo at sa pamamagitan ng pakikihalubilo sa mascot ng Jollibee.

Ito na ang pangalawang medical mission na isinagawa ng nasabing grupo na nagnanais na maibigay ang malusog na pangangatawan sa mga labis na ngangailangan.

Nagpahayag ng pasasalamat ang mga nakatanggap ng serbisyo dahil nagkaroon sila ng pagkakataon na matingnan ng doktor at mabigayan ng libreng gamot at iba pang serbisyo na kadalasan ay mahirap maiparating sa kanila dahil sa kalagayang heograpiko. Inaasahan na magkakaroon pa ulit ng ganitong uri ng aktibidad ang nasabing grupo na ang layunin ay maihatid ang tulong sa mga nasa laylayan ng lipunan. ###

Submitted by:May Jayden D. Manga